Yeh Haseen Sham

Yeh Haseen Shaam Apni,

Abhi Jis men Ghul Rahi Hai,

Tere Pairahan Ki Khushbu

Abhi Jis men Khil rahe Hain

Mere Khwab Ke Shagoofey,

Zara Dair Ka Hai Manzar.

Zara Dair Me Ufaq Pe

Khilega Koi Sitara,

Teri Simt Dekh Kar Wo

Karega Koi Ishara.

Tere Dil ko Aayega Phir

Kisi Yaad Ka Bulawa,

Koi Qissa-e-judai,

Koi Kaar-E-Naa-mukammal.

Koi Khwaab-e-naashagufta,

Koi Baat Kehne Wali.

Hamein Chahiye Tha Milna

Kisi ehd-e-meherbaan Mein.

Kisi Khwab Ke Yaqeen Mein,

Kisi Aur Aasman Par

Kisi Aur Sarzameen Mein,

Hamein Chahiye Tha Milna...